Retirate le patente de planeta a Pluton

PRAGA, 24 AUGUSTO - Post duo annos de debatto animate le Corte Spatial del Union Astronomic International (UAI), reunite in Praga, decideva de retirar le patente de Planeta de Prime Classe a Pluton.
Pluton esseva discoperite per le agente de Policia Astronomic Clyde Tombaugh in 1930 circulante in un orbita solar non regular e con un diametro que - post investigationes approfundate - resultava esser de sol 2300 km, multo inferior a illo del Terra (12750 km) e anque del Luna (3480 km). Decisive pro iste resolution del Corte le testimonio de Neptun, qui assereva de haber viste le accusato "sovente ebrie, como on pote deducer vidente su orbitas irregular". Pro evitar que il caso se repete, le Corte deliberava anque que le corpores celeste de nostre Systema Solar se reparti in tres categorias:

• Prime Classe - "Un Planeta es un corpo celeste qui sta in orbita circa le Sol e qui tene proprietates de terren (i.e. "massa") sufficiente pro mantener un proprie gravitate personal (i.e. ille debe esser sobrie) con equilibrio hydrostatic (i.e. ille non debe pissar se super) e de forma rotunde";
• Secunde Classe - "Un Planeta nano es un corpo celeste qui sta in orbita circa le Sol, qui tene qualque proprietate de terren (anque si a vices ille es ebrie) sin pissar se super e de forma rotunde". Secun iste definition, Pluton esseva degradate a Planeta Nano;
• Tertie Classe - "Tote le altere objectos que orbita circa le Sol es reguardate como corpores parve del Sistema Solar; illos non paga taxas, ma non ha derecto de voto".

Immediatemente post le deliberation del Corte, le protesta del association Gay Planet (Planeta omosexual) perveniva al agentias de pressa: "Isto es un acto de discrimination multo grave contra le corpores celeste omosexual: le judice ha volite percuter un symbolo del communitate gay e discoragiar altere planetas de facer 'outing' (declarar se omosexual, N.d.R.)".

Un video de soldatos israelian e libanese bibente the irrita Hezbullah

NOVE YORK, 18 AUGUSTO - Un video divulgate per le station televisive CNN provocava un ulterior polemica in Libano. In le video on pote vider soldatos libanese qui recipe amicabilmente soldatos israelian in le fortalessa militar del localitate libanese de Maryeyun. Depost, le imagines monstra le soldatos del duo nationes qui conversa durante que le libaneses offere bicarios de the calide.
Le militia de Hezbullah, qui labora desde alcun mense a un projecto commissionate per Syria e Iran pro "cancellar Israel del mappas geographic", se irritava fortemente quia "con iste calor de augusto, illes debeva offerer the glaciate."

Commentario del Oculo - Ecce como nasceva le legenda que Hezbullah es inhospital al israelianes! Le culpa, como sempre, es del Presidente Arbusto (angl. Bush) ...

Proposition de citatanitate avantiate pro le corpores celeste extra-communitari

VIENNA, 18 AUGUSTO - Sequente le appello del Papa qui invitava le astronomos a "haber pietate" del corpores celeste povre que vive in le peripheria de nostre systema solar, un projecto de resolution pro dar plen derectos de citatanos de nostre Systema Solar al planetas extra-communitari que jurara de volver solmente circa le Sol e de respectar le Constitution planetari esseva presentate mercuridi 16 in le assemblea general del Union Astronomic International (UAI) que se celebra en Praga.

"Le problema es que usque nunc il non esseva un definition official de Planeta del Systema Solar", diceva al Oculo le portavoce del Observatorio National de Astronomia de Japon, Junachi Watanabe.
Le nove proposito essera debattite durante tote le septimana, ante de proceder a su votation in le Corte de Justitia del UAI le proxime die 24. Si essera acceptate, plure corpores celeste extra-communitari potera rogar le citatanitate solar, pro exemplo Ceres, Caronte e 2003-UBS313.

Secun le ideas progressista, pro que un corpore celeste pote esser appellate Planeta de un Stella debe complir duo conditiones: que tene massa sufficiente pro su gravitate personal, con equilibrio hidrostatic (i.e. non debe pissar se super), e que es monogame (i.e. debe volver circa un sol stella).
In ultra a reciper iste ideas, le texto proponite, titulate 'Resolution del UAI pro GA-XXVI', affirma que "le forma debe tener plus que 800 kilometros de diametro".
Totevia, un planeta potera esser minor, sempre que tene un massa de al minus 50 elevate a 20 kilogrammos.
Secun iste proposta, Pluton mantenerea su status de planeta, anque si il esseva multo rumor in le ultime annos sur su particular gustos sexual, e il esserea statuite un nove categoria de 'planetas plutonic', que comprenderea ille planetas que sta "plus ultra que Neptuno e cuje orbita es irregular".
Tote le planetas - secun iste definitiones - que potera demonstrar de haber orbitate circa le Sol in le ultime 10 milliones de annos, de haber regularmente pagate le taxa de sojorno e de non esser jammais arrestate pro circulation in stato de ebrietate potera rogar le citatanitate solar. Si acceptate, iste planetas debera ingagiar se a volver solmente circa le Sol e al respecto del Constitution del Union.

"Iste projecto de lege es troppo permissive, e va crear problemas quia le planetas extra-communitari robara le luce solar al altere planetas e insidiara nostre feminas Venere, Gea e Selena", declarava al Oculo le planeta traditionalista Marte.

Le colpo de capite deveni un symbolo national francese

PARIS, 3 AUGUSTO - Post le parolas de laude del Presidente Chirac pro le footballero Zibidine Zidane e su (de Zibidine) leve punition per le organisation sportive, le colpo de capite contra le italianos deveniva rapidemente un symbolo national francese. Un joco pro le phones mobile ubi le jocator debe "finir" le rival italian se diffundeva inter le population, e un canto plaudente al gesto de Zizou ganiava le vertice del "hit (!!) parade" francese.
Ora esseva divulgate un video ubi on pote vider Miss Francia qui colpa de capite Miss Italia, e jam le expertos debatte sul characteristicas del ver colpo de capite francese. Jean-Baptiste Patuffon, professor de "Grandeur Nationale Incomparable" al Universitate del Sorbette, non ha dubitas: "le ver coup de boute a la francaise debe esser:

1. contra un rival, preferibilmente italian,
   
2. inexpectate, al fin de evitar reactiones damnose al honor national,
   
3. motivate per rationes mysteriose que non debe absolutemente esser disvelate al fin de lassar intuer que illos concerne le honor de Francia e/o le salvation del Mundo."

Post le vanificate conspiration terrorista, le Angleses passa al plano B

LONDON, 15 AUGUSTO - Le grande conspiration terrorista discoperite qualque die retro disvelava al Angleses que le plano del Premier Tony Blair al fin de conquirer "cordes e mentes" del citatanos britannic de fide musulman falleva miseremente. Assi le Prime Cive de London, Ken Livingstone, deliberava de lancear un plano plus efficace, sequente le monition del jornalista italian Oriana Fallaci: "Nos debe revenir al sol mesuras que in le passato se demonstrava valente contra le infideles: le Cruciates". Le exercitationes del patriotas anglese, como monstra le photo, ha jam initiate a presso del Turre de London.

Exhibe le permisso de conducer robate a su proprietario

CLEVELAND, 31 JULIO - Un bariste femina qui peteva un documento al fin de controlar si le juvene femina ante se habeva le etate legal pro biber alcoholicos videva tender a se su proprie permisso de conducer, que illa perdeva qualque septimana ante. Le juvene autor de iste imprudentia fugeva, ma in le die subsequente le policia arrestava in su demora Maria Bergan, 23 annos, con le incrimination per furto de identitate e acquisition de proprietate robate.
"Casos de iste sorta es multo rar," declarava le Capitano de Policia Guy Turner "specialmente quando, como in isto, qualcun de presentes al facto cognosce le ver identitate del robator e collabora con le policia. On pote affirmar que le sra Bergan esseva multo infortunate."

Le revelation del Oculo: quel que Materazzi diceva a Zidane

BERLIN, 12 JULIO - Le mysteriose parolas que discatenava le furia de Zinedine Zidane (dicite 'Zizou') al termino del final Francia - Italia de football remanera probabilmente incognite per semper, totevia multos essayava in dar un explication. Vole ben vider alcun de illos:

• "Fede musulman": secun plure sitos arabe isto esserea le insulto que Marco Materazzi (dicite 'Matrix') diceva a Zinedine Zidane, e que provocava le violente reaction del campion franco-algerine e su expulsion ex le finalissima del cuppa del mundo inter Italia e Francia. Iste these faceva in pauc tempore le gyro del mundo sur internet, suscitante le resentimento del usatores arabe. Le messages de indignation e ira per "le grave offensa portate al Islam" es alcun centenas. Etiam, 'un saudite' sur le sito de "al Arabiyah" pete "que Deo occide Materazzi", un altere sur le mesme sito assere sin hesitation "Quicunque de nos haberea reagite como Zinedine contra un jocator qui representa le scopatura de Europa".

• Jessica Rees, experto in lectura del labios, ha explicate a BBC Radio Five Live que le jocator italian diceva: "hijo de puta terrorista" (trad. "filio de prostituta terrorista"), cosa alquanto improbabile si on pensa que Zidane es francese, cognosce le italiano quia jocava longemente in Italia e que Materazzi es italian. Totevia, le matre de Zidane credeva a iste version e peteva a su filio "le testiculos de Materazzi sur un platto" (le matres es semper plus moderate quam filios).

• Secun un nove bulletin de BBC, Matrix desirava "un morte horribile a ille e su familia", conturbante Zinedine que in ultra al stress del finale habeva preoccupationes pro su matre qui esseva transportate in hospital le mesme die.
• Le tv brasilian Rede Globo, in vice, sustene que le defensor de Italia dava le titulo de prostituta al soror de Zizou, Lila;
• Le hypothese preferite in Italia es un parve scena. Zidane: "Ehi, quita tirar mi malia. Si vermente tu lo vole, io te lo donaro post le fin del joco". Materazzi: "No, gratias, io ha jam lo de tu sposa Veronique".
• Mokhtarr Addad, cosino de Zizou, ha un opinion multe personal: "Secun me ille diceva a Zizou filio de un Harkis". Un Harkis, al tempores del Battalia de Algeri, esseva un collaborationiste del franceses. Il sembla alquanto improbabile que "Matrix" ha similar cognoscentia de historia....

Ma finalmente le Oculo Interlinguistic succedeva resolver le enigma, pagante un clarividente tibetan qui - post longe meditation - assereva que le parolas exacte de Materazzi esseva: "Secun me, tu es assi stupide que te facera expeller in le final del final..."

Un conspiration de Bush le 11/9, secun alcun dissidentes S.U.A.

NOVE YORK, 2 JUNIO - Un association de dissidentes american publicava in su sito le "probas" que le attentato al Turres Gemine e al Pentagono esseva un conspiration de Presidente Bush (Arbusto in interlingua) e del ambiente "Teo-Con" pro imponer leges que infringe le privacy del citatanos S.U.A. Inter le probas adducte, le "facto" que plure personages del ambiente governative telephonava a amicos e parentes le die avante recommendante de non prender le aeroplan.

Iste theoria non es surprendente, in effecto illo es solmente le ultime de un longe serie que accompania le homine desde le prehistoria. Probabilmente qualque homine de Neanderthal diceva que le arrivata del homines Sapiens Sapiens habeva essite appellate per le Presidente Cava (Cave in Anglese) pro devenir le patrono absolute de Neanderthalia; postea le Athenieses accusava le Spartanos de alliantia con le imperator Persian, le Romanos accusava le Carthagineses de ruptura de pactos, in le medievo totes accusava qualcun de esser le Antichristo o un servitor de Satana e diffunder le peste e - in tempores plus recente - le policia czariste excogitava le conspiration judaic scribente le "Protocollo del Sagios de Zion", Churchill occideva Mussolini pro occultar su relationes compromittente, Kennedy esseva assassinate per su fratre, jelose de Marilyn Monroe e Ernesto "Che" (Que in Interlingua) Guevara per Fidel Castro, etc. etc.

Iste vice le theoria es ancora plus incredibile: como poteva un confusionario como le Presidente Arbusto succeder in un projecto assi complexe, quando non succede in poner un pede avante le altere sur un gazon regular sin cader?

Un altere "bonazza" russe ascende le vertices del tennis

ISTANBUL, 23 MAIO - Anastasia Myskina se qualificava al quartos de final del torneo de Istanbul, prova WTA con un premio de 157 kEur. Le "bonazza" (termino jargonic que significa "bon tennista femina") russa, testa de serie numero 1, post que impressionava le spectatores e le judices masculo con su umbilico e su longe gambas, eliminava le bulgare Tsvetana Pironkova con le punctos 6-4, 6-2.

Le nove curso finlandese al Eurofestival 2006

Olim le finlandeses esseva cognoscite como personas educate, minimemente aggressive e sovente elegante in le vestirse e con lineamento fin.
Ma post le 51 Eurofestival del canto, tenite se in Athene in le dies 18-20 maio, ubi p.ex. le Espania presentava iste bon chicas, "Las Ketchup", le ideas del europees in re le finlandeses ha mutate, quia Finlandia conquireva le prime position con iste banda de delinquentes, de nomine Lordi, que intimidava le judices e menaciava le altere competitores. A causa de iste irregularitates, Serbia e Montenegro se retirava ex le competition. In patria le Lordi es anque suspectate de esser spiones del KGB russe.

Le nove curso finlandese esseva annunciate un anno retro, quando le Premier finlandese, sra Tarja H., reprochava duramente le alora Prime Ministre italian, sr. Berlusconi, qui habeva asserite "io debeva cortesar le sra H. con mi fascino latin pro haber le Agentia Alimentari Europee in Italia". Le sr Berlusconi ha 70 annos e es calve.

Le Codice da Vinci (2)

A Ceccano, (proxime a Frosinone, Italia) esseva arse in le placia del casa municipal un copia del libro "Le Codice de Vinci" de Dan Brown, quia judicate blaspheme e "que offende gravemente Jesus Christo".
Le initiativa esseva sumpte per un committee civic que assere "le christianos debe reager con fortia e conviction a iste horribile attacco al persona sanctissime de Jesus Christo" e denuncia le "tentativa operate per le libro e le film de negar al radice, con mendacios impudente, le dogmas de nostre fide, reducente le message christiano a un thriller hollywoodian".

In le mesme die il perveniva al committee un message de regratiamento del director Ron Howard, ancora choccate per le mal reception del critica a su film: "forsan ora alcun acquirera le ticket pro vider lo, gratias"

Compromisso al italian

Le nove vetuste Prime Ministro italian, sr Prodi, in su prime oration in le Parlamento proponeva un compromisso inter le theses del sustentores del matrimonio omosexual e los del catholics ultrantiste: "Tosto nos instituera le matrimonio pro sposos".

Disconcerto inter le episcopos italian: "Assi le credentes va esser confuse"

Le burgomaestro de London non discarga post haber pissate

Le Prime Cive de London, Ken Livingstone, communicava al pressa que in su domo desde 15 menses ille e su familia non usa le discarga del WC post haber urinate, al fin de non dissipar aqua.

"Io spera que il pote servir de exemplo" diceva le burgomaestro, notoriemente multo sensibile a themas como le effecto-conservatorio e le sparnio energetic.

In Anglaterra le bassinos es aride post un hiberno sin pluvias: Livingstone sustene que le sol solution pragmatic es le reduction del consumos, obtenibile per forte cambio del stilo de vita.

"Si on guida un pauc minus, usa le bicycletta un pauc plus, discarga le WC un pauc minus, usa le ampullas a consumo abattite etc. on pote facer un grande differentia".

Commentario del Oculo - Istos es pretextos pro illuder su sposa que ille non pissa in le lavabo.

Le Codice da Vinci

Pauc dies depost le publication, mesmo le musulmanes condemnava le film dirigite per Ron Howard: "Le figura de Jesus descripte in le pelicula es blaspheme". Ma le tour operators festa, quia il ha un boom de reservationes pro le viages in le locos que da hospitalitate al aventuras narrate in le novella best-seller de Dan Brown.

Commentario del Oculo - Il es injuste, nemo va visitar le locos del films in re Bush o Berlusconi.

Umbras chinese

Anque le rarissime 330 P4 de 1967, cuje existe sol 6 exemplares in le mundo, esseva falsificate per le abilissime artisanes chinese. Le Commissario europee, sr. Franco Frattini, exhibiva le photos del automobile contrafacte e lanceava le alarma-contrafaction: "Il necesse un systema clar de sanctiones penal".

Commentario del Oculo - Le false Ferrari esseva discoperite quia habeva le pharos a amandola.

Tchernobyl vinti annos depost

In le die 26 april 1986 le reactor numero quatro del central nuclear de Tchernobyl, in Ukraina explodeva, liberante un nube radioactive que se propagava in grande parte de Europa. Le consequentias del accidente provocava e continua a provocar millenas de mortos. E hodie in Europa le crise del Oriente Medie e le accrescimento del precio del petroleo accende novemente le debatto sur le energia nuclear.

Le commentario del Oculo - Le dilemma es: sin energia nos non pote viver, ma al altere latere si nos mori qui besonia de energia?

Diffidentia mafiose

Post le arresto del chef del Mafia sicilian Bernardo Provenzano, qui esseva recercato per 43 annos, le Policia discoperiva in su epistulas que non solmente ille vadeva a Marseille (Francia) in 2003 pro un operation de prostata, ma anque su vice, Matteo Denaro se adressava a un hospital de Barcelona (Espania) in 1994 pro esser operate al oculos.

Le commentario del Oculo - Pois que le chefs mafiose vive habitualmente indisturbate, isto significa que le Mafia disestima le Servicio Sanitari italian. Isto es vermente grave e significa pauc patriotismo.

In un seculo il essera perdite 3000 linguas in le mundo

Le Unesco estima que, del circa 6000 linguas parlate hodie in le mundo, le 50% disparera intra le 2100.

Le rhythmo de lor disparition se accelera secun le tempores semper plus stricte del globalisation economic que induce le exodo ab le campanias e ab le villages e le confusion del indigenes in le metropoles, ubi illes va perder lor antique idioma.

Con le perdita de iste linguas anque multe cognoscentias essera oblidate, quia le idiomas local son le expression de diverse modos de vider le realitate e illos monstra le plure faciettaturas del genio human. In addition, le disparition de un lingua crea semper problemas de identitate, quia le eradicamento social es fonte de alcoholismo o de tendentia al autodestruction.

In Europa le situation non es melior que in le resto del mundo: post le perdita in epocha prehistoric del linguas preindoeuropee, e in le antiquitate de linguas nobilissime qual le mysteriose lingua etrusc o le celtic continental, hodie il son sur le via de extinction le Occitan, le Ladino, le Gaelic, le Basc e multe alteres.

Le Anglese ha devenite de facto le secunde lingua plus parlate del mundo, ma presenta le grande inconveniente de avantagiar troppo le parlantes native. Il es surprendente que le Union Europee non examinava usque nunc le idea de introducer un lingua auxiliari como Interlingua pro resolver le problemas causate per le allargamento a 25 Paises del Union e le feroce rivalitate inter Francese e Germano.

Que diabolo es Interlingua?

Avante toto, in le stylo del Oculo, nos dice lo que Interlingua NON ES:

• ...un practica erotic moderate (anque si plure de nos ha nihil contra isto)
• ...le penose experientia que on essaya serrante le proprie lingua inter le dentes
• ...un sorta de "piercing" (ornamento perforante) que provoca plure enoios de sanitate
• ...le lingua parlate ante le turre de Babel (quando un certe Zamenhof initiava parlar Esperanto, causante le confusion del linguas)
• ...le lingua que le nord-americanos va parlar intra 50 annos (omne sape que illes va parlar Espaniol)¹
• ...un lingua fabricate in laboratorio
• ...le substituto del Anglese
• ...un association que organisa excambios cultural de studentes de paises diverse²

Post haber disembarassate le campo de iste equivocos periculose, vos ha probabilmente le sensation de saper le mesmo que antea in re Interlingua: nulle timor, nos pote disvelar de plus.

Le revelationes del Oculo

(suspense...tension...anxietate...un organo remote produce un musica inquietante)³

Interlingua plus que un lingua es un constatation: le vocabulario commun del linguas occidental pote functionar como un lingua franca. Le nomine de iste lingua es Interlingua.

Interlingua es un lingua...

• ...auxiliar
• ...appertinente a nemo
• ...ponte
• ...quasi-neutre
• ...que consente de dicer lo que on vole, anque si il es melio esser caute quia illo es comprensibile sin studio anterior

Esque il non ancora suffice a vos?

(Vos es sin dubita un pauc insistente)

Le scopo principal de Interlingua es le comprensibilitate immediate (sin o al plus con pauc studio) per un auditorio de occidentalophones.

Non fabricate in laboratorio

-- Interlingua non es un lingua artificialmente fabricate secundo preferentias particular de un sol persona o de un gruppo isolate de individuos. Le linguas occidental ha un fonte commun, e isto es particularmente evidente in lor vocabulario. Illo ha su origines in le linguas latin e grec, que deveniva tanto importante pro le cultura, primarimente in Europa ma postea anque in le mundo integre.

Per 25 annos alcun linguistas experte studiava profundemente le elementos commun in le linguas principal europee, elaborante certe principios pro le selection e le forma del parolas in Interlingua.

Le principios fundamental es:

• Un parola es adoptate in Interlingua si illo es commun a al minus tres del linguas anglese, francese, espaniol, portugese, italian e - in certe casos - german e russe. Le forma standardisate de un parola debe esser maximalmente conforme al linguas mentionate, i.e. apparer como le "denominator commun" del vocabulos e elementos in le linguas fonte.


• Le composition del grammatica e syntaxe es determinate per le collection de regulas e structuras in le linguas de base producente le systema le plus simple que es possibile pro possibilisar le uso del vocabulario in un lingua coherente. Pro exemplo, isto significa le exclusion de varie particularitates e formas specific del linguas constituente, ergo nulle
  generes grammatical, nulle declinationes e nulle conjugationes irregular de verbos;


• ni le vocabulario ni le grammatica o syntaxe de Interlingua es fixe, ma illos seque le
  evolution del linguas fonte. In le ultime 30 annos plus que 20000 vocabulos nove entrava in le vocabulario de Interlingua.

Le avantages es:

• Pro personas qui es familiar con le vocabulario pan-occidental, Interlingua es comprensibile a prime vista;
• per un texto in Interlingua on pote attinger un vaste pubblico multinational cultivate.
• Interlingua offere un utile introduction al tresor universal del vocabulos scientific, technic e cultural, quia illo affronta scientificamente le mesme problema de communication que le scientistas o le homines de litteras e cultura europee habeva in le passato.
• Illo anque facilita le studio de linguas romanic. Interlingua es in effecto un profitabile factor supplementari in studios linguistic. Le internationalitate del vocabulario e le simplicitate del grammatica pone tosto le cognoscitor de Interlingua in le position de un active
  usator de Espaniol, Francese, Italiano,. Portugese, Romaniano
• Interlingua es le sol lingua "politicamente correcte" quando alcun personas de linguas occidental diverse debatte themas delicate, pro exemplo un contracto o un conflicto de opinion o un litigio.

Notas

¹ secundo altere scientistas, illes va parlar Chinese; ma tote le scientistas, particularmente illes del Regno Unite, es de accordo que le nord-americanos jammais parlava Anglese.

² anque si isto poterea esser un bon idea pro financiar nostre movimento

³ subtitulo a cura del section Atmospheras del Oculo

Le Oculo Interlinguistic deveniva patre!

robocap annuncia vos un magne gaudio: le periodico aperiodic "Le Oculo Interlinguistic" generava un blog que porta le mesmo nomine! Le matre, sra Google, sta in bon sanitate.